Англиянинг "Манчестер Юнайтед" клуби камерунлик дарвозабони Андре Онана мавсумолди йиғини вақтида жароҳат олди. Бу ҳақда маҳаллий The Telegraph нашри хабар бермоқда.
Пай шикастланиши натижасида 29 ёшли футболчи 1 ойдан 2 ойгача сафдан чиқиши мумкин. Янги дарвозабон (Онана ўрнига) топиш бўйича фаол иш олиб боришни режалаштирмаган жамоа раҳбарияти қидирувни бошлашга мажбур бўладиганга ўхшайди.
Ўтган мавсумда нархи 25 миллион еврога тенг бўлган Онана 50 та ўйинда майдонга тушиб, 65 та тўп ўтказиб юборган. Дарвозабон ҳисобида 11 та "қуруқ" ўйин бор. Унинг жамоаси Европа Лигаси финалига қадар етиб борди ва АПЛда ўн бешинчи ўринни эгаллади.
