Мадриднинг "Атлетико" клуби "Ботафого" ҳужумкор ярим ҳимоячиси Тьяго Альмада трансфери устида иш бошлади.

Шанба куни "матрасчилар" 24 ёшли футболчи бўйича сўров билан мурожаат қилиб, эҳтимолий битим шартларини билиб олишди, дея хабар бермоқда инсайдер Фабрицио Романо. Аргентиналик футболчининг трансферига "Ботафого" билан музокарага киришган Португалиянинг "Бенфика" клуби ҳам қизиқиш билдирмоқда.

Тьяго Альмада 2024/25 йилги мавсумнинг иккинчи ярмини Франциянинг "Лион" клубида ижарада ўтказди ва "тўқувчилар" сафида 20 та ўйинда 2 та гол ва 5 та голли узатмани амалга оширди. Аргентина терма жамоаси футболчисининг Transfermarkt талқинига кўра, нархи 25 млн еврони ташкил этади.