"Реал" ва "Ливерпуль" яқин келажакда футболчи алмашиши мумкин. Real Madrid Confidential хабарига кўра, "Энфилд"га ҳужумчи Родриго, "Сантьяго Бернабеу"га эса ҳимоячи Ибраима Конате бориши мумкин. Шу билан бирга, "қизиллар" яна 35 миллион евро атрофида қўшимча маблағ тўлаши кутилмоқда.
Аввалроқ матбуотда 26 ёшли Конате "Реал"га ўтмоқчи экани ҳақида хабарлар тарқалган эди. "Ливерпуль" бир йилдан кейин французни текинга йўқотмаслик учун уни сотиб юбориши мумкин. 24 ёшли Родриго ҳам мунтазам равишда миш-мишларда тилга олинади. Бразилиялик футболчи клублар ўртасидаги жаҳон чемпионатида кам ўйнаган, бу эса уни келажак ҳақида ўйлашга мажбур қилиши мумкин. Родриго 2026 йил ёзида Бразилия терма жамоаси сафида жаҳон чемпионатида иштирок этиш учун яхши имкониятга эга бўлиш учун тез-тез ўйнашни хоҳлайди.
