"Ювентус" марказий ярим ҳимоячиси Италиядаги бир йиллик фаолиятидан сўнг Англия Премьер-лигасига қайтиши мумкин.
Журналист Себастьен Видалнинг таъкидлашича, "Эвертон" 27 ёшли бразилиялик футболчини ижарага олиш бўйича "Ювентус" билан музокаралар олиб бормоқда. Аммо Луиснинг ўзи хавбекка қизиқиш билдираётган "Тоттенхэм"га ўтишни маъқул кўрмоқда.
"Ювентус" ўтган ёзда "Астон Вилла"дан Дуглас Луисни 51,5 млн еврога сотиб олган эди. Туринликлар сафида ярим ҳимоячи барча мусобақаларда 27 та ўйинда майдонга тушди, аммо самарали ҳаракатлари билан ажралиб турмади.
Луиснинг "Ювентус" билан амалдаги меҳнат шартномаси 2029 йилнинг ярмигача мўлжалланган.
