Ла Лига чемпиони "Барселона" Жоан Гампер кубоги учун Италиянинг "Комо" клубига қарши 10 август куни "Камп Ноу"да ўтказиш ғоясидан воз кечиши мумкин.
3cat нашри хабар беришича, ўша санага қадар стадионни очиш режаларига қарамай, реконструкция ишлари кечикиб кетгани сабабли шаҳар ҳокимияти уни эгаллаш учун лицензия беришга тайёр эмас.
"Spotify Camp Nou"даги қурилиш, айниқса, биринчи ва иккинчи трибуналарда режадан орқада қолмоқда. Барча ишлар якунланмагунча, шаҳарсозлик бўлими томошабинлар билан ўйин ўтказишга рухсат бермайди. "Барселона" сўнгги бор афсонавий аренада 2023 йилнинг март ойида ўйнаган, шундан сўнг жамоа вақтинча "Olimpik Lluis Kompani"га кўчиб ўтган.
Клуб энди Ла Лига доирасида "Валенсия" билан уй учрашуви режалаштирилган 14 сентябргача қайтишга умид қилмоқда. Бироқ, бу сана ҳам сўроқ остида. Айни вақтда, Ханси Флик шогирдлари 16 август куни "Мальорка"га қарши мавсумни бошлашдан олдин Япония ва Жанубий Кореяда мавсумолди йиғинларини ўтказишади.
