Хабарингиз бор, «Навбаҳор»нинг 23 ёшли ҳимоячиси Шаҳзод Тоиров биринчи даврада кам ўйин амалиётига эга бўлганлиги боис, ўзаро келишувга асосан, жамоани тарк этди. Тоиров жорий мавсумнинг биринчи ярмида «лочинлар» таркибида  жами 4 та учрашувда майдонга тушиб, 288 дақиқа ҳаракат қилди.

Клуб матбуот хизмати ходимлари Шаҳзод Тоировдан интервью олишди.

— Шаҳзод, жамоада жуда қисқа вақт бўлдингиз, «Навбаҳор»ни бу қадар эрта тарк этишингизнинг сабаби нимада?

— Авваламбор, ассалому алайкум. Тўғри таъкидладингиз, «Навбаҳор»даги фаолиятим жуда эрта якунланди. Бунга эса ўйин амалиётининг камлиги  асосий сабаб бўлди. Ҳозир футбол ўйнайдиган ёшда бўлганим, футболчи сифатида янада ривожланишим кераклиги боис, жамоани тарк этишга қарор қилдим.

— ОКМКга ўтишингиз қандай содир бўлди? Мазкур жамоага ким таклиф этди?

— Биринчи давра якунланишига 4-5 та тур қолганида, менга Олмалиқ клуби раҳбариятидан чақирув бўлди. Келажак режаларим ҳақида сўрашди. «Навбаҳор» билан шартномам борлиги учун уларга аниқ жавоб беролмагандим. Кейин давра якунида ОКМКдан яна алоқага чиқишди. Аслида олмалиқликлар жорий мавсум аввалида ҳам менга таклиф билан чиқишган эди. Мен ўшанда яхши ниятлар билан «Навбаҳор»ни танлагандим. ОКМКнинг бу сафарги таклифини эса қабул қилдим. Мени Баҳодир Мирзаев таклиф этди.

— «Навбаҳор»даги қисқа фаолиятингиздан қандай таассуротлар қолди?

— Намангандаги фаолиятим қисқа бўлсада, жуда катта таассурот ва ҳиссиётлар бера олди. Наманганлик мухлисларга алоҳида респект деган бўлардим. Улар доимо юртимизда тенгсиз эканликларини исботлашга ҳаракат қилишади. «Навбаҳор» ишқибозлари яратган атмосферада Европа нафасини ҳис қилдим. Уларни унутмайман. «Навбаҳор»даги қисқа даврим, ширин хотиралар билан эслаш ҳамда соғинишга арзигулик давр бўлди, дея оламан.

— «Навбаҳор»дан кетишингизга клуб раҳбариятидаги ўзгаришлар ҳам таъсир ўтказдими?

— Йўқ, Наманган жамоасидан кетишимнинг асосий сабаби, мураббийларнинг менга ишонч билдиришмагани бўлди. Мураббийнинг режасига кирмасангизу клуб раҳбарлари ёки мухлислар “жамоада қолинг”, дейишгани билан ҳеч нарсани ўзгартириб бўлмайди.

— «Навбаҳор»дан кетмоқчи эканингизни айтганингизда, «Навбаҳор» ПФК раҳбарияти ва мураббийлар штаби қандай реакция қилишди?

— Жамоани тарк этмоқчи эканлигимни биринчи бўлиб,  жамоа бош мураббийи Сергей Лушанга айтдим. Мураббий айни пайтда режаларига мени киритмаётганини, жамоанинг асосий таркиби ўзагини аниқлаб олганлигини, шунинг учун ҳеч нарсани ўзгартирмоқчи эмаслигини таъкидлади. Шу боис, кетишим энг тўғри йўл эканини англаб етдим.

Тўғри, клуб раҳбарлари озгина шошилмаслигимни, ҳали ҳаммаси олдинда эканини айтишди. Бироқ менга ўйин амалиёти керак эди. Шунинг учун «Навбаҳор»дан кетдим.

— Сўнгги сўз ўрнида мухлисларга тилакларингиз...

— «Навбаҳор»даги қисқа фаолиятим давомида мени қўллаб-қувватлаган, мен билан дўст бўлган барчага ўз миннатдорчилигимни билдираман. Наманганлик мухлисларга эса омад ва зафарлар тилайман. «Навбаҳор» ишқибозларини менга кўрсатган ҳурматларини ҳеч қачон унутмайман. Собиқ жамоадошларимга ҳам раҳмат.

«Навбаҳор»га эса 2-давра ўйинларида омад ёр бўлишини тилайман.

«Навбаҳор» ПФК матбуот хизмати.