"Ливерпуль" янги ҳужумчи билан келишиб бўлган. Яқин келажакда Арне Слот жамоаси таркибини ҳозирда "Айнтрахт" шарафини ҳимоя қилаётган Уго Экитике билан тўлдириши мумкин.
Ижтимоий тармоқларда журналист Фабрис Хокинснинг ёзишича, "Ливерпуль" Экитике билан 6 мавсумлик шартнома борасида келишиб бўлган. 23 ёшли футболчи фақат Мерсисайд клубига ўтишни истамоқда - "Ньюкасл" музокаралардан чиқди.
Шу билан бирга, BBC маълумотни тўлдиради - "Ливерпуль" Экитикенинг трансферини яқин дам олиш кунларигача ёпиши мумкин. Аввалроқ, "Айнтрахт" "Ньюкасл"нинг футболчи учун 70 миллион фунт (81 миллион евро) миқдоридаги таклифини рад этганди. Шунга кўра, "Ливерпуль"нинг таклифи каттароқ бўлиши кутилмоқда.













