"Андижон" бугун Тожикистон йиғини доирасидаги илк назорат учрашувини "Эсхата" жамоасига қарши ўтказади.
Айтиш жоизки, ушбу рақиб андижонликлар учун бегона эмас. Ёдингизда бўлса, икки йил муқаддам "Андижон" Тожикистонда йиғин ўтказган чоғида айнан "Эсхата" билан ўртоқлик учрашувида беллашганди. 2023 йилнинг 12 июль санасида бўлиб ўтган ўйин қизиқарли ва голларга бой ўтган бўлиб, унда водийликлар 3:2 ҳисобида ғалаба қозонган.
Ўшанда "Андижон" сафида Фарҳод Бекмуратов, Илҳом Абдуғаниев ва Суҳроб Бердиев рақиб дарвозасини ишғол қилишган.
"Эсхата" айни пайтда Тожикистон олий лигасида биринчи даврадан сўнг 12 та клуб орасида 13 та ўйиндан кейин 4 ғалаба, 5 дуранг ва 4 мағлубият қайд этиб, мусобақа жадвалида 7-ўринни банд этиб турибди.
Жамоани маҳаллий мутахассис Шуҳрат Умаров бошқариб боряпти. У шу йилнинг февраль ойида бош мураббий лавозимига тайинланган.
"Эсхата" сафида ўзбекистонлик Иззатилла Турсунов, Сардор Хурсандов, Зоир Турсунов, Миржалол Қосимов, Диёр Шавқиев, Санжар Рихсибоев ва Хамидулло Абдуҳамидов тўп тепишмоқда.
"Андижон" – "Эсхата" беллашуви "бургутлар" истиқомат қилаётган "Нацбанк" спорт соғломлантириш марказининг майдонида соат 17:45 да бошланади.
