"Манчестер Юнайтед" таркибни кучайтириш устида ишлашда давом этмоқда. A Bola нашри тарқатган хабарга кўра "қизил иблислар" "Арсенал"дан топ ҳужумчи Виктор Дьёкерешни тортиб олишга яқин турибди.
Манбага кўра, "Юнайтед" "Спортинг" ва "Арсенал" ўртасидаги музокаралар боши берк кўчага кириб қолганидан фойдаланишга қарор қилган. "Қизил иблислар" "канонирлар"нинг 27 ёшли швециялик футболчи бўйича таклифини синдиришга тайёр. Гап 80 миллион евро ҳақида кетиши мумкин.
Виктор Дьёкереш ўтган мавсумда 52 та ўйинда 54 та гол урган. Аввалроқ швед Рубен Аморим билан ишлаган эди. Португалиялик мураббий ўтган йилнинг кузида "Манчестер Юнайтед"га "Спортинг"дан кўчиб ўтган эди.
