"Борнмут" ҳимоячиси Илья Забарний ушбу трансфер ойнасида клубини ўзгартириши мумкин - Caught Offside маълумотига кўра, айни дамда айнан "Тоттенхэм" музокараларда энг катта қатъият кўрсатмоқда.
Манбанинг таъкидлашича, Лондон клуби "Борнмут" талабларини қондиришга тайёр бўлган ягона даъвогар - 22 ёшли украиналик учун инглизлар камида 70 миллион евро ва бонуслар сўрамоқда.
Аввалроқ Забарнийга "ПСЖ", "Челси", "Ливерпуль" ва "Ньюкасл" қизиқиш билдирган, аммо "Борнмут" раҳбарияти уларнинг таклифларини етарли эмас деб ҳисоблаб, рад этганди. Шу билан бирга, футболчининг ўзи, манбага кўра, айнан Париж клубига ўтишга моил ва ҳозирча бошқа жамоалар билан музокаралар олиб бормаяпти. "ПСЖ" қизиқишда давом этмоқда ва ёзги трансфер ойнаси ёпилгунга қадар трансферни келишиб олишга умид қилмоқда.
