Лондоннинг "Арсенал" клуби бош мураббийи Микель Артета ярим ҳимоячи Мартин Субименди билан шартнома имзолаш бўйича фикрлари билан ўртоқлашди.
"Канонирлар" испаниялик футболчини "Реал Сосьедад"дан сотиб олганини июль ойи бошида эълон қилганди. Хавбекнинг Лондон гранди сафига ўтиши ҳақидаги гап-сўзлар 2024/25 йилги мавсум давомида ҳам бўлганди. Футболчига Мадриднинг "Реал" клуби ҳам даъвогарлик қилганди.
"Бу жуда узоқ давом этган жараён. Мартин нима хоҳлашини ўйлаб кўриш учун етарлича вақтга эга эди. Яхшиямки, "Арсенал" - ажойиб клуб, шунинг учун ҳамма бу ерда ўйнашни хоҳлайди. Бу трансфер учун у бошқа ажойиб имкониятлардан воз кечди. Биз Субимендининг ишидан жуда таъсирландик - у аллақачон жамоа учун қанчалик фойдали бўлиши мумкинлигини кўрсатди. Мен бундан жуда хурсандман," - деди Артета интервьюсида.
Мартин Субимендининг трансфер нархи 70 млн еврога баҳоланмоқда.
