Россиялик машҳур мураббий Валерий Непомняший Туркиянинг "Истанбул Башакшеҳир" клубига ўтишга яқин турган ярим ҳимоячи Аббосбек Файзуллаевнинг ЦСКАдан кетиши мумкинлиги ҳақида фикр билдирди.
Мутахассиснинг фикрича, ёш футболчи "ҳарбийлар" сафида янада ўсиши мумкин эди, аммо клуб учун бундай келишув ҳозирги шароитда заруратдир.
"Файзуллаев ЦСКА учун йўқотиш бўлади. У яна ўсиши мумкин эди. Лекин бу фойдали сотув. Бундан қочиб қутулиб бўлмайди - ЦСКА пул ишлаб топишга мажбур", - деди Непомняший "Чемпионат"га берган интервьюсида.
Эслатиб ўтамиз, аввалроқ "Башакшеҳир" ва ЦСКА тахминан етти миллион евролик трансфер шартларини келишиб олгани маълум бўлганди.
