AS хабарига кўра, "Барселона" ярим ҳимоячиси Френки де Йонг Каталония клуби билан шартномани узайтириш бўйича мураккаб музокаралар фонида агенти Али Дурсун билан хайрлашди.

Энди "Барса"да ностандарт вазият юзага келди - янги шартнома шартларини муҳокама қилиш музлатилди, чунки де Йонгнинг ҳозирда расмий вакили йўқ. Нашр маълумотларига кўра, нидерландиялик футболчининг Нидерландияда унга ҳуқуқий масалаларда ёрдам берадиган шахсий адвокати бор, аммо у ФИФА лицензиясига эга эмас ва трансферлар ва шартномалар бўйича музокараларда қатнаша олмайди. Шу тариқа, "Барселона" де Йонг янги агент топишини кутишига тўғри келади.

28 ёшли хавбек каталонияликлар сафида 2019 йилдан буён тўп тепиб келмоқда. Ўтган мавсумда у "Барса" сафида барча мусобақаларда 46 та ўйинда майдонга тушиб, 2 та гол урди ва 2 та голли узатмани амалга оширди.