ЦСКАнинг 21 ёшли яримҳимоячиси Аббосбек Файзуллаев "Истанбул Башакшеҳир"да тиббий кўрикдан ўтмоқда ва тез орада турк клуби билан шартнома имзолаши мумкин.
ЦСКАнинг собиқ ҳужумчиси Валерий Масалитин вазиятга ўз муносабатини билдирди. Унинг сўзларига кўра, тактикадаги ўзгаришлар футболчининг жамоадаги ролига салбий таъсир кўрсатган.
"Николич ЦСКАда схемани ўзгартирди, Челестини буни давом эттирди. Шундай бўлдики, Файзуллаевнинг янги воқеликка мослашиши қийин кечди. Биз унинг Николич даврида кам фойда келтирганини кўрдик. У ўзини йўқотиб қўйди. Фақат бир нарса қолади: ё сотиш, ёки ижарага бериш", - дея экспертнинг сўзларини келтиради Vprognoze.ru.
Ўтган мавсумда Файзуллаев ЦСКА сафида 39 та ўйинда майдонга тушиб, рақиблар дарвозасини уч марта ишғол қилди ва шерикларига саккизта голли узатмани амалга оширди.
