"Ювентус" ёзда Николас Гонсалес билан хайрлашмоқчи, аммо футболчининг келажаги мавҳумлигича қолмоқда. Аргентиналик футболчи "кекса синьора" бош мураббийи Игор Тудорнинг режаларига кирмайди - футболчи аллақачон лойиҳадан чиқариб ташланган. Sky Sport хабарига кўра, Гонсалесга Европанинг икки нуфузли клуби - Миланнинг "Интер" ва Мадриднинг "Атлетико" клублари даъвогарлик қилмоқда. Бироқ, ҳозирда аниқ музокаралар олиб борилмаяпти.
Николас Гонсалес "Ювентус"да атиги бир мавсум ўтказди: ўтган йилнинг ёзида туринликлар уни "Фиорентина"дан 28 млн еврога сотиб олиш шарти билан ижарага олганди. Вингернинг ҳозирги нархи Transfermarkt мутахассислари томонидан 24 млн еврога баҳоланмоқда.
