"Байер" ўзининг расмий сайтида жамоа сафига янги ҳужумчи келиб қўшилганини эълон қилди. Гап Нжикура Бомба ҳақида кетмоқда. Бомба "доришунослар" сафида март ойида, балоғат ёшига етганидан бошлаб ўйинларда иштирок этиши мумкин. Унгача истеъдодли ҳужумчи Малининг "Бамако" клуби сафида ўйнашда давом этади.
Нжикура Бомба жорий йилнинг апрель ойида эътиборни тортганди. Африка ўсмирлар кубогининг олтита ўйинида Бомба ўз ҳисобига учта гол ва иккита голли узатмани ёздириб қўйди. Малиликлар ушбу турнирда финалга қадар етиб боришди ва Марокашга пенальтилар сериясида мағлуб бўлишди.














