"Комо" президенти лавозимида ишлаб келаётган Мирван Суварсо ҳужумчи Альваро Моратанинг эҳтимолий трансфери ҳақида гапирди. Суварсонинг сўзларига кўра, агар "Милан" ва "Галатасарой" футболчини Туркиядан муддатидан олдин қайтариш бўйича ўзаро келишиб олса, трансфер амалга ошади.
"Альваро Мората учун шартнома тайёр. У шартларга рози бўлди ва биз барча тафсилотларни "Милан" билан келишиб олдик. Энди биз шунчаки "Галатасарой" ва "Милан" ўртасидаги музокараларни кутяпмиз. Биз ўз ишимизни бажардик," - дея Суварсонинг сўзларини келтиради журналист Фабрицио Романо Sky телеканалига таяниб.
Эслатиб ўтамиз, февраль ойида "Галатасарой" Альваро Моратани "Милан"дан бир йил муддатга ижарага олган эди.
