"Насаф"-"Қизилқум" учрашуви якунига етгач, ҳар икки жамоа мураббийлари ўйин ҳақида фикрлари билан ўртоқлашишди. Дастлаб меҳмон жамоа мураббийи Рустам Забиров  бугунги баҳс тўғрисида шундай деди:

— Бугун биз футбол савиясининг энг пастки ҳолатини намойиш этиб бердик. Футбол ўйнолмаслик қандай бўлишини кўрсатиб бердик. Шогирдларим ўйин бошланишидан тезкор голлар ўтказиб, кейин ўзларига келиши қийин бўлди.“Насаф” таркибида тезкор ўйинчилар борлигини, уларни жарима майдонида ёлғиз қолдириш яхши оқибатларга олиб келмаслигини уларга уқтиргандим! “Қизилқум” таркибида айрим футболчилар биринчи лига савиясидаги футболчилардек ҳаракат қилишди.

 — “Қизилқум” ҳафта бошида Ўзбекистон кубоги доирасида “Локомотив”ни мағлуб этганди?

— Ўшанда футболчиларимиз худди бразилияликлардек ҳаракат қилишганди. Қисқа ва аниқ паслар, рақибдан тўпни олиб қўйишлар... Қисқаси 3-4 футболчининг жароҳати ҳам жамоавий ўйинни издан чиқаради.

— Жамоангиз ёшлар таркибида ишончни оқлайдиган футболчилар йўқми?

— Йўқ, деса ҳам бўлади! “Насаф”дек ўз академиясиги эга, базаси, стадиони доим аъло даражада сақланадиган жамоалар жуда кам бизда. Республикамиздаги кўпгина жамоалар “Насаф”дагидек шароитни орзу қилишади.