"Ливерпуль" футболчиси Луис Диас Германияга қўнди. Журналист Кэрри Хау хабарига кўра, 28 ёшли вингер айни дамда Мюнхен аэропортида бўлиб турибди. Бугун колумбиялик футболчи трансферни якунлаш учун зарур бўлган тиббий кўрикдан ўтади ва шундан сўнг "Бавария" билан шартнома имзолайди.
Аввал хабар қилинганидек, "Ливерпуль" Луис Диасни сотишдан тахминан 75 млн евро ишлаб олади. Футболчининг Бундеслига гранди билан шартномаси 2029 йилнинг ёзигача мўлжалланган бўлади.
Диас мерсисайдликлар сафида уч ярим йил тўп тепди. Футболчи барча мусобақаларда "қизиллар" сафида 148 та ўйинда 41 та гол урган ва 23 та голли узатмани амалга оширган.
