Бирлашган Араб Амирликларининг Дубай шаҳрида бундан бир ой муқаддам ўтган “Dubai First Off-Season” халқаро робототехника мусобақасида Ўзбекистон вакиллари саралаш босқичида 8 та энг яхши натижани қўлга киритиб, Хитой Халқ Республикасида бўладиган финал босқичида иштирок этиш ҳуқуқини қўлга киритган эди.
Дубай баҳсларида яккахон тартибда биринчи, умумжамоа ҳисобида иккинчи ўринни эгаллаб, "Энг яхши бошқарув" номинацияси соҳиби бўлган Ўзбекистон миллий робототехника жамоаси куни кеча Хитойда якунланган финал мусобақаларида ҳам яхши натижаларни қайд этди.Саня шаҳрида ўтказилган “Sanya WRC 2025” халқаро мусобақасида дунёнинг турли давлатларидан 2 минг нафардан ортиқ робототехника йўналишида изланишлар олиб бораётган ёш тадқиқотчилар ўзларининг янги инновацион технологияларини глобал майдонда синовдан ўтказди.
Халқаро турнирнинг биринчи кунида 6 та йўналишнинг барчасида муваффақиятга эришган Ўзбекистон жамоаси якуний рейтингда 3-ўринни эгаллади.
Баҳсларнинг сўнгги кунги натижалари сарҳисобига кўра, Ўзбекистон миллий робототехника жамоаси мусобақа давомидаги техник маҳорати, жамоавий ҳамжиҳатлиги ва инновацион ёндашуви билан “Excellence Award” мукофотига лойиқ кўрилди.
