BILD хабарига кўра, Жэйдон Санчо ёзда Дортмунднинг "Боруссия" клубига қайтиш учун маошини 50 фоизга камайтиришга тайёр.
"Боруссия" Санчо билан алоқада бўлиб турибди ва 25 ёшли англиялик ҳужум чизиғини кучайтириш учун клубнинг устувор мақсадлари рўйхатига киритилган. Қолаверса, футболчининг ўзи Дортмундга қайтишга тайёрлигини билдирган. Аммо трансфер амалга ошиши учун Санчо маошини сезиларли даражада камайтиришга мажбур бўлади ва у бунга тайёр.
Ҳозирда Санчо "Манчестер Юнайтед"да йилига 16 миллион евро маош олади, "Боруссия"да эса 8 миллион атрофида маош олишга рози. Шунинг ўзи ҳам уни жамоадаги энг кўп маош олувчи футболчилардан бирига айлантирган бўларди. Агар трансфер амалга ошса, Санчо учинчи марта "Боруссия"га ўтган бўлади.
Жэйдон Санчо 2024/25 йилги мавсумда "Челси"да ижара асосида ўйнаган. У барча мусобақаларда 41 та ўйинда 5 та гол урди ва 10 та голли узатмани амалга оширди.
