«Андижон» клуби янги дарвозабони Эржан Токотаев Суперлиганинг 16-тури доирасида бўлиб ўтган «Қўқон-1912»га қарши ўйинда дебют қилди. Ўйиндан сўнг қирғизистонлик посбон ўз фикрлари билан ўртоқлашди.
"Аввало, "Андижон" сафида дебют ўйинни ўтказганимдан хурсандман. Бу лаҳзани кутгандим. Биринчи ўйинимда ўз дарвозамдан гол ўтказмагани ёқимли бўлди. Ўз уйимизда мухлислар қаршисида ғалаба қозонганимиздан мамнунман. Ўйин давомида бизни қўллаб-қувватлаган мухлисларга раҳмат айтаман.
Сэйвлар ҳақида тўхталадиган бўлсам, зарбалар жуда ҳам мураккаб бўлди, дея олмайман. Аммо уларни қайтаришга ҳаракат қилдим.
Жамоага мослашишим қийин бўлмади. Аҳил жамоа йиғилган. Улар билан бирга эканимдан хурсандман.
Мухлислар эса энг зўри! Уларга алоҳида раҳмат. Бизни қўллаб-қувватлашда давом этишсин", — деди Эржан.













