Жиззахнинг “Дизак” футзал жамоаси Ўзбекистон футзал федерацияси Регламентида белгиланган талабларга риоя этмагани учун 2025/2026 йилги мавсум Олий лига ҳамда Кубок мусобақаларида иштирок этиш ҳуқуқидан маҳрум этилди.

Ўзбекистон футзал федерацияси Ишчи гуруҳи томонидан Жиззах вилоятида ўтказилган текширув натижасида жамоа томонидан мусобақа Регламентининг қуйидаги моддаларига амал қилинмагани аниқланди:

Ўзбекистон футзал федерациясининг 2025 йил 9 январда тасдиқланган Устави 4.4-банди;

Ўзбекистон футзал федерацияси томонидан ўтказиладиган футзал мусобақалари Регламенти 8.10-банди;

“Дизак” футзал клуби томонидан жамоа билан боғлиқ молиявий қарздорликлар бартараф этилмаган. Бир неча марта муҳлат берилиши, огоҳлантирилишига қарамасдан 2024-, 2025-йилги мавсумлар учун мураббийлар штаби ва футболчилар олдидаги катта миқдордаги қарздорлик узилмаган. Клубга алоҳида ҳомий бириктирилмаган. Жамоанинг янги мавсумда мусобақаларда барқарор иштирок эта олмаслик хавфи мавжуд.

Юқоридаги камчиликлар жамоанинг профессионал мусобақаларда иштирок этиш имкониятини чеклайди. Шу боис, Ўзбекистон футзал федерация Ижроия қўмитаси томонидан "Дизак" жамоасини 2025/2026 йилги мавсумда Олий лига ва Кубок баҳсларидан четлатиш, унинг ўрнини Ўтиш мусобақасида учинчи ўринни эгаллаган “Нефтчи” футзал клуби билан тўлдириш тўғрисида қарор қабул қилинди.

“Дизак” клубининг биринчи лигада иштирок этиши масаласи мавжуд камчиликлар (мураббийлар ва футболчилар билан боғлиқ молиявий қарздорлик, алоҳида ҳомий бириктирилиши, 2025/2026-йилги мавсум учун жамоанинг молиявий стратегияси тақдим этилиши, клубга алоҳида, мустақил раҳбар тайинланиши) 2025 йилнинг 1 сентябрига қадар бартараф этилганидан сўнг, меъёрий Регламентда белгиланган тартибда кўриб чиқилади.