"Манчестер Сити" ҳужумкор ярим ҳимоячи Жек Грилишни "Эвертон"га қўйиб юборишга шошилмаяпти.
"Шаҳарликлар" 29 ёшли футболчи билан хайрлашишга тайёр, аммо ҳозирча уни ўз сафига қўшиб олмоқчи бўлганларга ён бермаяпти. Журналист Бен Жейкобснинг маълум қилишича, "Манчестер Сити" агар "ирислар" футболчининг ижара давридаги маошининг 100 фоизини тўласа, Грилишни "Эвертон"га қўйиб юборишга рози бўлади. Ҳозирда инглиз ҳафтасига тахминан 300 минг фунт стерлинг (деярли 350 минг евро) маош олишини ҳисобга олсак, бундай сценарий эҳтимолдан йироқ кўринади.
Сентябрь ойида Жек Грилиш 30 ёшга тўлади. Унинг Манчестер гранди билан шартномаси 2027 йилнинг ярмигача мўлжалланган.
