Суперлиганинг 17-туридан ўрин олган “Насаф” – “Андижон” (1:1) ўртасидаги учрашувидан кейинги матбуот анжуманида дастлаб меҳмонлар бош мураббийи Максим Шацких қатнашди.
- Хайрли оқшом. Ўйлайманки, ўйин мухлисларга ёқди. Жуда қизиқарли учрашув бўлди. Рақиб томонидан ҳам, биз томондан ҳам режаланган ишларни амалга оширишга ҳаракат қилдик. Учрашувдан аввал футболчиларга берган кўрсатмаларни улар бажаришди. Бу ўйинга йигитлар кўп куч сарфлашди. Унутмайликки, сафарда амалдаги чемпион жамоага қарши майдонга тушдик. Ўйиндан ва натижадан қониқдим.
- Натижадан рози бўлдингизми?
- Натижадан розиман. Бу учрашувда ютишимиз ҳам, ютқазишимиз ҳам мумкин эди.
- Максим Александрович, учрашув қандай бўлишини кутгандингиз?
- Биз шундай ўйин бўлишини, “Насаф” ўйинни назорат қилишини сезгандик. Шундай экан, қарши ҳужумларда вазиятларни пойлаб олдинга ўтишни режа қилганмиз. Биринчи таймда бизда бундай имкониятлар бир неча маротаба юз берди. Иккинчи таймда ҳам бундай имконият бўлди. Баъзи вазиятларда тажриба етишмай қолди. Йигитларга раҳмат айтаман, улар охиригача чидашди.
- Иккинчи даврадаги ўзгаришлардан қониқиш ҳосил қилдингизми?
- Ҳа, мамнунман. Энди иккита турни ўтказдик. Барчаси режа асосида давом этяпти. Биз иккинчи даврага яхши тайёргарлик олиб бордик. Олдимизда яна учта тур бор ва кейин чемпионатда бироз танаффус бўлади. Чемпионатимизни ушбу ўйинлари орқали Осиё Чемпионлар лигасига яхши тайёргарлик кўриб борамиз.
- Кўриниб турибдики, жамоа ўйини яхши томонга ўзгарган...
- Ўйиндан-ўйинга вазиятга қараб ўзгаришларни қилишга ҳаракат қиляпмиз, тактик ва жисмоний томондан ҳам.
