«Барселона» президенти Жоан Лапорта дарвозабон Марк-Андре тер Штеген билан боғлиқ можароли вазиятга изоҳ берди.

«Марк жамоамиз сардори бўлиб қолади, аввалги келишмовчиликлар ҳал этилди. У майдонда ўз лидерлигини исботлади ва мухлислар сардоримиз жамоани қандай олдинга етаклашини кўрадилар. У клубда 11 йилдан бери, ва мен унинг яна сардорлик вазифасини бажараётганидан мамнунман. Унинг позициясини ҳисобга олган ҳолда, Ла Лиганинг тиббий комиссияси розилиги асосида Жоан Гарсияни рўйхатдан ўтказишни режалаштиряпмиз. Қолган трансферлар бўйича иш давом этяпти. Агар биринчи тургача ҳаммаси битмаса, бизда ҳали вақт бор», — дея Лапортанинг сўзларини TV3 келтирди.

Аввалроқ немис дарвозабони белидаги жароҳати сабаб операция қилдирган ва Ла Лига тиббий комиссияси учун хулосага имзо қўйишдан бош тортгани боис, янги дарвозабон Жоан Гарсияни рўйхатдан ўтказиш масаласида муаммо юзага келган эди. Клуб уни вақтинча сардорлик боғичидан маҳрум этган эди. Кейин можаро бартараф этилди ва Тер Штегенга сардорлик боғичи қайтарилди.