Америкалик бокс шарҳловчиси Ҳарри Уильямс ўзбекистонлик супер оғир вазн тоифасида рингга чиқадиган Баҳодир Жалолов (15-0, 14 КО) британиялик 20 ёшли Мозес Итаума (12-0, 10 КО) билан жанг қилиши кераклигини айтди. Бу ҳақда Sports.kz нашри хабар берди.

Ҳозирга қадар Жалолов профессионал боксда кучсиз рақиблар билан жанг қилгани учун танқидга учраб келади. Ҳарри Уилямснинг таъкидлашича, агар у Мозес Итаумага қарши рингга чиқса, бу каби танқидларга нуқта қўйиши мумкин:

"Итаума ва Жалолов ўртасида жанг ташкил этиш лозим. Итаума бор-йўғи 20 ёшда, ҳаваскор боксда унчалик катта тажрибага эга эмас. Шунга қарамай, у жаҳон чемпионлиги учун даъвогар сифатида қаралмоқда. Жалолов эса 31 ёшда — у ҳаваскор ва профессионал рингда катта тажрибага эга, икки карра Олимпия чемпиони ва чемпионлик унвонига асосий номзодлардан бири. Агар Итаума шундай кучли рақибни мағлуб этса, бу унинг фаолиятидаги катта ютуқ бўлади. Ёки аксинча бўлса, Жалолов ўзига нисбатан танқидларга нуқта қўяди", — деб ёзди Уильямс ўзининг Х (собиқ Twitter) саҳифасида.

Баҳодир Жалолов профессионал боксда 15 марта рингга чиққан бўлиб, улардан 14 тасини нокаут билан, 1 тасини эса ҳакамлар қарори билан ютган. У сўнгги жангини 2025-йил 5-апрель куни Қозоғистоннинг Остона шаҳрида украиналик Игор Шевадзутский (12-3, 10 КО)га қарши ўтказди. Ушбу баҳсда Жалолов ҳакамлар якдил қарори билан ғалаба қозонди.

Шунингдек, Жалолов 26-июл куни АҚШнинг Нью-Йорк шаҳрида италиялик боксчи Жанмарко Кардилога қарши навбатдаги жангини ўтказиши керак эди. Бироқ Кардилонинг соғлиғи билан боғлиқ муаммолар туфайли жанг бекор қилинган.

Мозес Итаума атиги 20 ёшда бўлишига қарамай, профессионал боксда ажойиб натижаларни кўрсатмоқда. У ҳозиргача 12 жанг ўтказган ва уларнинг барчасида ғалаба қозонган (10 таси — нокаут билан). Итаума сўнгги жангини 2025-йил 24-май куни америкалик тажрибали боксчи Майк Балогунга қарши ўтказди. Жанг иккинчи раундда техник нокаут (ТКО) билан якунланди ва Мозес ўзининг мағлубиятсиз сериясини давом эттирди.