Ҳужумчи Жакомо Распадори яқинда "Наполи"дан Мадриднинг "Атлетико" клубига ўтди. Трансфер душанба куни расман тасдиқланди, битим қиймати 22 млн еврога баҳоланмоқда.
25 ёшли форварднинг кетиши ҳақидаги хабарга кўп ўтмай неаполликлар сардори Жованни ди Лоренцо муносабат билдирди.
"Бизга сенинг муҳим голларинг энди етишмайди, Жакомино. Кейинги фаолиятингда омад тилайман!," - дея неаполликлар ҳимоячисининг сўзларини келтиради журналист Альфредо Педулла.
Жакомо Распадори "Наполи"да уч йил ўтказди ва бу вақт ичида жамоа билан иккита скудетто ютишга муваффақ бўлди. Футболчи барча турнирларда Италиянинг амалдаги чемпионлари сафида 109 та ўйинда майдонга тушиб, 18 та гол урган ва ўнта голли узатмани амалга оширган.
