Футбол бўйича Ўзбекистон Суперлигасининг охирги икки турида “Нефтчи”нинг ўйинларида сезганим – трансляция кадрлари қандайдир сифатли бўлиб қолгани бўлди. Худди Европа ёки бой араб мамлакатларидан қилинган трансляциялардек — такрорий лавҳалар ёқимли даражада секин ва сифатли эди. Тепадаги видеони кўринг-да — Ўзбекистонда бўлган ва ўзбекистонлик мутахассислар томонидан тасвирга олинган ўйинлардан парчалар.
Бунинг сирини ЎзПФЛ бугун айтди — ташкилот ўзи олти профессионал камераси бор кўчма телевизион станция ясабди, шу олти камерадан учтаси Super Slow motion камера экан, шунинг учун Алишер Одиловнинг “Қўқон-1912” дарвозасига ёки Русланбек Жияновнинг “Андижон” дарвозасига урган голлари шунақа чиройли кўринган экан-да менга. Миллий футболимизнинг “товар кўриниши” мана шундай яхшилангани билан бутун футбол жамоатчилигимизни табрикласа арзийди. Ижтимоий тармоқлар замонида бу жуда муҳим.
Бу кетишда ЎзПФЛ ҳали ўзининг телеканалини ҳам очиб, ўзининг шафелигида ўтказилаётган футбол учрашувлари томошасини обуна асосида сотишни ҳам йўлга қўйса керак. Ва бунга чинакам салоҳият бордек: ташкилотнинг Youtube'даги саҳифасида, масалан, охирги турдаги “Динамо” — “Пахтакор” ўйинини 113 минг марта, “Нефтчи” — “Насаф” ўйинини эса 136 минг марта томоша қилинган. Менимча, зўр кўрсаткич.
