Москванинг "Локомотив" клуби юлдузи Алексей Батраков "Манчестер Сити" селекцион бўлими эътиборига тушди. Бу ҳақда Legalbet хабар бермоқда.
Манбага кўра, "шаҳарликлар" скаутлари ярим ҳимоячи вакиллари билан эҳтимолий трансферни муҳокама қилишган. Қайд этилишича, Батраковнинг тўғридан-тўғри "Манчестер Сити"га ўтиши даргумон. Хавбек фақат учинчи жамоа орқали Англияга кўчиб ўтиши мумкин.
Шу билан бирга, Батраков фақат Европанинг топ-5 лигаларида ўйнашни хоҳлайди. "Манчестер Сити"га эгалик қилувчи City Football Group холдингига бундай жамоалардан фақат биттаси - Испаниянинг "Жирона" клуби киради.
Жорий мавсумда Батраков "темирйўлчилар" сафида 7 та ўйинда 8 та гол урди. Transfermarkt маълумотларига кўра, унинг нархи - 12 млн евро.
