"Барселона" бош мураббийи Ханс-Дитер Флик клуб раҳбариятидан ҳимоячи Жерар Мартинни имкон қадар тезроқ мавсум учун таркибга қўшишини талаб қилди, деб хабар беради Marca нашри.
Испания газетасининг ёзишича, немис мураббийи Мартиннинг ўйинидан қойил қолган ва у таркибни кучайтириш учун керак, деб ҳисобламоқда. Ўтган мавсумда 23 ёшли Мартин барча турнирларни ҳисобга олган ҳолда 42та ўйинда қатнашиб, битта гол урди ва олтита голли узатмани амалга оширди.
Испания чемпионатининг 1-турида "Барселона" сафарда "Мальорка"ни 3:0 ҳисобида мағлубиятга учратди. Каталонияликларнинг кейинги рақиби "Леванте" бўлади.













