"Ливерпуль" бош мураббийи Арне Слот клуб ёзги трансфер ойнасида трансфер бозоридаги фаолиятини давом эттириши мумкин бўлган шартни айтди.
Унинг сўзларига кўра, жамоа таркиби яхши. Қолаверса, у футболчилар сони янада камроқ бўлишини истарди, чунки мутахассис уларнинг ҳар бирини мотивация қилишда, таркиб танлашда ва ўйин амалиёти беришда қийналмоқда.
"Аммо бизни ҳақиқатан ҳам кучлироқ қила оладиган ўйинчилар бўлса, демак, клуб уларни сотиб олади. Аммо фақат ҳаммаси тўғри бўлса - мос ўйинчи, нарх ва позиция," - дея Слотнинг сўзларини келтиради Liverpool Echo.
"Қизиллар"нинг сўнгги трансфер мақсади "Ньюкасл"нинг швециялик форварди Александр Исак эди. "Ливерпуль" ҳужумчи учун 138 млн евро таклиф қилган, аммо "ҳаккалар" футболчини қўйиб юборишга тайёр эмас.
