Англиянинг Манчестер шаҳрида бўлиб турган Ўзбекистон МОҚ ва футбол ассоциацияси раҳбарияти сафар давомида “Манчестер сити” клубининг штаб-квартираси ҳамда жамоа академиясига ташриф буюрди. Мутасаддилар клуб тарихи ва унинг тизими билан яқиндан танишишди.
Жамоа мутахассислари ўзбекистонлик расмийларга клубнинг маркетинг, академия фаолияти ва ундаги футбол таълими, халқаро алоқалар, селекция ва бошқа йўналишлардаги фаолияти ҳақида батафсил маълумот беришди. Шунингдек, инглиз клуби тажрибасини Юқори Чирчиқ туманида қурилган Миллий футбол марказида татбиқ этиш борасида фикр алмашилди.
Ташриф якунида расмийлар “Манчестер Сити” жамоасининг машғулот базасини кўришди. Шу ернинг ўзида клуб бош мураббийи, жаҳон футболи афсонаси Хосеп Гвардиола, қолаверса, Ўзбекистон миллий терма жамоаси ҳимоячиси ва «шаҳарликлар» ҳимоячиси Абдуқодир Ҳусанов билан суҳбат ташкил этилди.
