"Тоттенхэм" "Комо"га ярим ҳимоячи Николас Пасни сотиб олиш бўйича янгиланган трансфер таклифини юборди, аммо итальян клуби уни рад этди. Бу ҳақда Sky Sport Italia хабар бермоқда.

Манбага кўра, лондонликлар футболчи учун 50 млн евро таклиф қилган, аммо италияликлар камида 70 млн евро олишни истамоқда. Футболчининг ўзи ҳам ҳозирча ушбу трансферга қизиқиш билдирмаяпти.

Пас "Комо" сафида 2024 йилнинг ёзидан буён тўп тепиб келмоқда. Ўтган мавсумда ярим ҳимоячи А Серияда 35 та ўйинда майдонга тушиб, 6 та гол ва 9 та голли узатмага муаллифлик қилди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган.