Дида, Карлос, Каннаваро, Матератци, Майкон, Рибери, Макелеле, Заккардо, Сержиньо ва Кураньи каби жаҳон футболи юлдузларининг Ўзбекистонда бўлиб турганидан хабарингиз бор. Бугун футбол афсоналари Миллий футбол марказига ташриф буюриб, янги бунёд этилган замонавий футбол инфратузилмаси билан яқиндан танишдилар.
Ўзбекистон футбол ассоциацияси биринчи вице-президенти Равшан Ирматов ва футзал федерацияси президенти Бекзод Маматқулов ҳамроҳлигида меҳмонлар спорт тиббиёти маркази, соғломлаштириш ва тикланиш бўлимлари ҳамда футболчилар истиқомат қилиши учун мўлжалланган меҳмонхона билан танишдилар. Афсонавий футболчилар ушбу яратилган шароитларни юксак баҳоладилар.
Шунингдек, Миллий терма жамоамиз ва U-17 Осиё чемпионати ғолиби бўлган ўсмирлар терма жамоаси билан учрашув ташкил этилди. Футбол афсоналари жамоаларимизга самимий тилаклар билдириб, олдинда турган Жаҳон чемпионатида улкан муваффақиятлар тиладилар.













