Италиянинг "Удинезе" клуби ҳужумчиси Алексис Санчес фаолиятини "Севилья"да давом эттиради. Бу ҳақда инсайдер Николо Скира хабар бермоқда.
Манбага кўра, 36 ёшли чилилик футболчи "Удинезе"дан "Севилья"га текинга ўтади. Ҳужумчи испан жамоаси билан яна бир мавсумга узайтириш имконияти билан бир йиллик шартнома имзолайди.
Санчес "Удинезе" сафида ўтган йилнинг августидан буён тўп суриб келмоқда. 2024/25 йилги мавсумда у А Серия ва Италия Кубогида 14 та ўйинда иштирок этди, аммо самарали ҳаракат қила олмади. Янги мавсумда ҳужумчи майдонга тушмади.
"Севилья" уч турдан сўнг Испания чемпионати турнир жадвалида 12-ўринни эгаллаб турибди.













