«Тоттенҳэм» «ПСЖ» форварди Рандаль Коло Муани ижарага олди. Франциялик ҳужумчи 2025/2026 йилги мавсумни Лондонда ўтказади. Жамоа бош мураббийи Томас Франк футболчининг ўтиши ҳақида фикр билдирди.

«Рандаль — юқори даражадаги ўйинчи, у йиллар давомида Чемпионлар лигаси клубларида ўз салоҳиятини исботлади, шунингдек, Франция терма жамоаси билан катта тажриба тўплади.

У яхши ёшда, карьерасининг авжига чиққан пайти. Премьер-лига ва бизнинг услубимизга мос сифатларга эга. У ҳужумда қўшимча имкониятлар яратади, қанотлар орқали ҳам, марказ орқали ҳам ўйнаш имконини беради.

Биз барчамиз Рандаль жамоага нималар бера олиши мумкинлигидан хурсандмиз ва у билан ишлашни сабрсизлик билан кутяпман», — дея Дания мутахассисининг сўзларини клубнинг расмий сайти келтиради.

Эслатиб ўтамиз, ўтган мавсумнинг иккинчи ярмини Коло Муани ижара асосида «Ювентус»да ўтказган эди. А Серияда у 16 та ўйинда майдонга тушиб, 8 та гол урди ва 1 та голли узатма амалга оширди. Transfermarkt маълумотларига кўра, футболчининг бозор қиймати 30 млн еврони ташкил этади.