«Tottenhem» «PSJ» forvardi Randal Kolo Muani ijaraga oldi. Fransiyalik hujumchi 2025/2026 yilgi mavsumni Londonda o‘tkazadi. Jamoa bosh murabbiyi Tomas Frank futbolchining o‘tishi haqida fikr bildirdi.

«Randal — yuqori darajadagi o‘yinchi, u yillar davomida Chempionlar ligasi klublarida o‘z salohiyatini isbotladi, shuningdek, Fransiya terma jamoasi bilan katta tajriba to‘pladi.

U yaxshi yoshda, karyerasining avjiga chiqqan payti. Premyer-liga va bizning uslubimizga mos sifatlarga ega. U hujumda qo‘shimcha imkoniyatlar yaratadi, qanotlar orqali ham, markaz orqali ham o‘ynash imkonini beradi.

Biz barchamiz Randal jamoaga nimalar bera olishi mumkinligidan xursandmiz va u bilan ishlashni sabrsizlik bilan kutyapman», — deya Daniya mutaxassisining so‘zlarini klubning rasmiy sayti keltiradi.

Eslatib o‘tamiz, o‘tgan mavsumning ikkinchi yarmini Kolo Muani ijara asosida «Yuventus»da o‘tkazgan edi. A Seriyada u 16 ta o‘yinda maydonga tushib, 8 ta gol urdi va 1 ta golli uzatma amalga oshirdi. Transfermarkt ma’lumotlariga ko‘ra, futbolchining bozor qiymati 30 mln yevroni tashkil etadi.