"Кристал Пэлас" марказий ҳимоячиси Марк Гехи ёзги трансфер ойнасида "Ливерпуль"га ўтмади.
"Қизиллар" трансфер ойнасининг сўнгги соатларида шартномани расмийлаштиришга ҳаракат қилишди, бироқ келишув амалга ошмади. 25 ёшли футболчи содир бўлган воқеадан жуда норози ва келаси йили "бургутлар" сафини деярли аниқ тарк этади - у мавсум якунланганидан кейин тугайдиган шартномани узайтирмайди.
Журналист Алекс Крукнинг ёзишича, Гехига "Бавария" даъвогарлик қилмоқда. Мюнхен гранди инглиз футболчисини 2026 йилнинг ёзида эркин агент сифатида таклиф қилишдан манфаатдор. "Ливерпуль" ҳам футболчини ўз сафига қўшиб олиш ғоясидан воз кечмади, аммо у учун курашда ғалаба қозониш осон бўлмаслиги мумкин: январь ойидан бошлаб футболчига хориж клуби билан шартнома олдидан келишув тузишга рухсат берилади.
