"Комо" ҳужумчиси Альваро Мората Испания терма жамоасидаги фаолиятини якунлаш борасида фикрлари билан ўртоқлашди.
32 ёшли футболчи халқаро фаолиятини якунлаши ҳақидаги миш-мишларга қарамай, терма жамоадаги фаолиятини давом эттирмоқда. Бош мураббий Луис де ла Фуэнте тажрибали форвардни сентябрь ойида бўлиб ўтадиган ЖЧ-2026 саралаш ўйинлари учун "қизил фурия" сафига чақирди.
"Ҳар доимгидек терма жамоада ўйнашни сабрсизлик билан кутяпман. Аҳволим яхши, жамоада эканимдан хурсандман. Кетиш ҳақида ўйламаяпман. Мен кўплаб қийинчиликларни бошдан кечирдим ва ҳамма нарса бўлиши мумкинлигини биламан, лекин ҳозир бутун эътиборимни ўйинга қаратганман. Ўз мамлакати миллий жамоасида ўйнаш - футболчилик фаолиятимдаги энг яхши ҳиссиётлардир," - деди Мората матбуот анжуманида.
