"Барселона" вингери Ламин Ямал Испания терма жамоаси сафида яна бир бор голли узатмани амалга оширди.
18 ёшли футболчи бугунги ЖЧ-2026 саралашида Болгария дарвозасига киритилган учинчи голга Микель Меринога ассистентлик қилди. Шу тариқа, Ямал 2023 йил сентябрь ойида дебют қилганидан бери тўққизта голли узатмани амалга оширди - бу Европа терма жамоаларининг барча ўйинчилари орасида франциялик Килиан Мбаппедан (11) кейин иккинчи кўрсаткич, шунингдек, португалиялик Бруну Фернандешнинг ҳисобида ҳам тўққизта голли узатма бор.
Болгарияга қарши ўйин Ламин Ямал учун "қизил фурия" либосидаги 22-ўйин бўлди. Вундеркинд нафақат тўққизта голли узатмани амалга оширди, балки ўзи ҳам олтита гол урди.
