Италия терма жамоаси Женнаро Гаттузо бошчилигидаги дебют ўйинида Эстония терма жамоасига ҳеч қандай имконият қолдирмаяпти, аммо биринчи голни узоқроқ кутишга тўғри келди.
Биринчи бўлимнинг ўзидаёқ "скуадра адзурра" меҳмонлар дарвозасига 17 та зарба йўллади. Opta’нинг қайд этишича, бу италияликлар учун сўнгги олти йил ичидаги рекорд кўрсаткичдир (2019 йил март ойида жамоа Лихтенштейн билан ўйиннинг биринчи бўлимида 26 та зарба берганди).
Италия терма жамоаси тинимсиз уринишларига қарамай, танаффусга қадар гол ура олмади. Ҳисоб фақат 58-дақиқада очилди - янги мураббий қўл остидаги биринчи голга Мойзе Кин муаллифлик қилди. Кўп ўтмай Матео Ретеги ва Жакомо Распадори ҳисобни ишончли кўринишга келтирди - 3:0.
