Франция ёшлар терма жамоаси яримҳимоячиси, 20 ёшли Валентен Атаньяна «Реймс»дан Саудия Арабистонининг «Ал-Аҳли» клубига ўтди. Клубларнинг матбуот хизматлари келишувни расман тасдиқлади. ОАВ маълумотларига кўра, трансфер суммаси 25 миллион еврони ташкил этди.

«Ҳаммаси учун раҳмат, Валентен. «Реймс» сен қандай футболчи ва инсон бўлиб етишганингдан фахрланади ва сенга кейинги фаолиятингда катта муваффақиятлар тилайди. Биз сенинг йўлингни катта диққат ва меҳр билан кузатиб борамиз», — дейилади «Реймс»нинг расмий сайтидаги хабарда.

Атаньяна — «Реймс» академияси тарбияланувчиси. У асосий жамоа сафида барча мусобақаларда 63 та ўйин ўтказган ва битта гол урган. Шунингдек, Камерунда туғилган яримҳимоячи Франция ёшлар термалари сафида 47 та учрашувда майдонга тушиб, 6 та гол киритган.