Ёзда "Челси"дан "Манчестер Сити"га кўчиб ўтган дарвозабон Маркус Беттинелли Кобхэмда қўшнилари билан низога аралашиб қолди.
32 ёшли дарвозабон тегишли рухсатнома олмасдан ўзига тегишли ҳовли ҳудудида 2 миллион фунтга автотураргоҳ қурган.
Туман аҳолиси янги автотураргоҳ турар-жой мажмуасининг қиёфасини бузаётганини ва бошқа мулкдорлар учун хавфли ҳолатни келтириб чиқараётганини айтиб, ер қазиш ишларидан норози бўлишди. Уларнинг сўзларига кўра, Беттинелли участкаси аллақачон етарлича автотураргоҳга эга бўлган.
Футболчининг ўзи ўз ҳуқуқлари доирасида ҳаракат қилганини таъкидламоқда, чунки қурилиш унинг мулки чегарасида олиб борилган. Можаро дарвозабон ўз қароргоҳи ёнидаги 12 метрлик дарахтларни кесиб ташлаганидан бир неча ҳафта ўтиб бошланган.
Беттинелли шу ёзда фаолиятини якунлаган собиқ футболчи Скотт Карсоннинг ўрнини эгаллаб, "Сити"нинг учинчи дарвозабонига айланди. Келаётган якшанба куни Пеп Гвардиола жамоаси Премьер-лигада Манчестер дербисида "Манчестер Юнайтед"га қарши баҳс олиб боради.
