"Барселона" "Валенсия"ни 6000 томошабинга мўлжалланган стадионида қабул қилади.
Ла Лиганинг 4-туридан ўрин олган "Барселона" - "Валенсия" учрашуви 14 сентябрь, якшанба куни бўлиб ўтади.
"Камп Ноу"даги реконструкция ишлари тугалланмагани сабабли Каталония клуби узоқ вақт давомида ўйин ўтказиладиган жойни белгилай олмади.
"Клуб яқин ҳафталарда "Камп Ноу"ни очиш учун зарур маъмурий рухсатномаларни олиш устида фаол ишламоқда. Шу муносабат билан ўйин "Эстади Йохан Кройфф"да бўлиб ўтади.
"Барселона" ўз аъзолари ва мухлисларига янгиланган "Камп Ноу" стадионига қайтишдек машаққатли, аммо ҳаяжонли жараённи тушунганликлари ва қўллаб-қувватлаганликлари учун миннатдорчилик билдиради.
Тез орада клуб ўйинни ташкил этиш ва чипталарни сотиш тартиби бўйича батафсил маълумот беради", — дейилади "кўк-анорранглилар"нинг расмий хабарида.
Эслатиб ўтамиз, аввалроқ Ла Лига "Барселона"га истисно тариқасида "Валенсия"га қарши 6000 томошабинга мўлжалланган аренада ўйнашга рухсат берган эди.
