Қозондаги бутунжаҳон Универсиада мусобақаларининг бокс тури ўзбекистонлик спортчилар учун жуда омадли келмоқда. Бугунги куннинг ўзидаги натижалари буни тасдиқлаб турибди.
Куннинг иккинчи қисмида рингга кўтарилган яна уч нафар спортчимиз чорак финал учрашувларини муваффақиятли якунлашди ва ярим финал йўлланмасини қўлга киритишди.
75кг. вазнда юртимиз шарафини ҳимоя қилаётган Азизбек Абдуғофуров эстониялик Каупо Арро билан чорак финал жангида икки раунддаги устунли эвазига ярим финал йўлланмасини қўлга киритди. Энди Азизбек эртага қозоғистонлик Нурдаулет Жармановга қарши рингга кўтарилади. Нурдаулет чорак финалда грузиялик Жаба Хоситашвилидан устун келган.
-91 кг. вазн тоифасида рингга чиқаётган Рустам Тулаганов ҳам чорак финалда эстониялик Раин Карлсондан уччала раунд устунлигига кўра ғалаба қозонди ва финалга чиқиш учун франциялик Дайлан Брегун билан рингга чиқиш имкониятига эга бўлди. Брегун чорак финалда руминиялик Виктор Ялимовдан устун келган.
+91 кг. вазн тоифасида ҳам ярим финалда курашни давом эттирадиган спортчимиз бор. Мирзоҳид Абдуллаев чорак италиялик Марио Федерикини таслим этиб бу имкониятни қўлга киритди. Энди уни финал остонасида россиялик Магомед Умаров билан бўладиган жанг кутиб турибди. Умаров чорак финалда украиналик Ростислав Архипенкони мағлубиятга учратганди.