"Челси" ўзининг расмий веб-сайтида баёнот эълон қилди. Бу баёнот Англия футбол ассоциацияси томонидан клубга қарши 2009-2022 йиллар давомида, яъни Роман Абрамович "аристократлар"нинг эгаси бўлган даврда, 74 та айблов илгари сурилганидан сўнг чиқарилди.
"Челси"нинг таъкидлашича, клубнинг амалдаги хўжайинлари 2022 йил 30 май куни клубни сотиб олиш бўйича келишувни якунлаган. Ўша пайтда ўтказилган текширув давомида ўтган йиллар учун молиявий ҳисобот тўлиқ бўлмаслиги мумкинлиги аниқланди. Бу ҳақда клубнинг ўзи Футбол ассоциацияси ва бошқа тартибга солувчи органларга маълум қилган.
"Клуб ушбу жараёнда мисли кўрилмаган шаффофликни намойиш этди, жумладан, файллар ва тарихий маълумотларга тўлиқ кириш имкониятини тақдим этди. Бу ишни тезроқ якунлаш учун Футбол ассоциацияси билан ҳамкорликни давом эттирамиз," - дейилади баёнотда.
"Челси" футбол ассоциациясига ҳамкорлик учун миннатдорчилик билдирди.
