«Барселона» ва Испания терма жамоаси ҳужумчиси Ламин Ямаль 18 ёшга тўлганини нишонлаш маросими билан боғлиқ можарога муносабат билдирди.

«Мен асабийлашмадим. Ҳатто менга кулгили туюлди. Буни турли йўллар билан ёмон кўрсатишга уринишди. Бир аёл мен қизларни танлаб олганим ҳақида турли гапларни тўқиди, бунинг ҳаммаси ёлғон эди. Кейин яна ўша ерда ишлаган официантлар ҳақида ҳам турли ҳикоялар чиқди», — дея Ямалнинг сўзларини келтиради Marca.

Аввалроқ хабар қилинганидек, Ямалнинг туғилган куни паст бўйли одамларни олиб келишгани айтилган. Испания Ижтимоий ҳуқуқлар вазирлиги бу ҳолатда ногиронлик ҳақидаги қонун бузилган-бузилмаганини аниқлаш мақсадида прокуратурага, омбудсман ва нафрат асосидаги жиноятларга қарши кураш бошқармасига мурожаат қилган. Ушбу қонун одамларни масхара қилувчи ёки камситувчи чиқишлар ва кўрсатувларни тақиқлайди.