"Бавария" бош мураббийи Венсан Компани "Гамбург"га қарши ўйин арафасида журналистлар билан суҳбатлашди. У "Бавария"га "Челси"дан ижара асосида келиб қўшилган жамоанинг янги аъзоси Николас Жексон ҳақида ўз фикрларини билдириб ўтди.

"Биринчи босқич унинг учун жуда муҳим - кейинги халқаро танаффусгача. "Челси"да у мавсумолди тайёргарликдан тўлиқ ўтмаган, аммо у туғма атлет ва яна 100 фоиз кучга эга бўлиши учун кўп вақт керак бўлмайди. Биз унинг ўйин ритмини тиклаш ҳақида қайғуришимиз керак.

У катта сифатга эга ўйинчи, у Премьер-лигада кўп гол урган. Ишонаманки, биз унинг кучли томонларидан жуда тез фойдалана оламиз. Бизда жуда мослашувчан ҳужум чизиғи бор. Унинг профили тўлиқ мос келади, чунки у ҳар ким билан ўйнай олади. У бу мавсумда муҳим роль ўйнайди," - деди Компани.

Ўтган мавсумда Жексон "Челси" сафида барча мусобақаларда 34та ўйинда майдонга тушиб, 13та гол урган ва 5та голга ҳаммуаллифлик қилган.