"Барселона" бош мураббийи Ханс-Дитер Флик вингер Рафинья Диасни асосий таркибда майдонга туширмасликка қарор қилганини изоҳлади.
Бразилиялик футболчи якшанба кунги "Валенсия"га қарши ўйинни захира ўриндиғида бошлади ва танаффусдан сўнг дебютант Руни Барджининг ўрнига майдонга тушди. Захирадан майдонга тушганидан кўп ўтмай, "кўк-анорранглилар" ҳужумининг 28 ёшли етакчиси дубль қайд этди. Беллашув каталонияликларнинг йирик 6:0 ҳисобидаги ғалабаси билан якунланди.
Ўйиндан олдин ОАВда Флик Рафиньяни кечикиб келгани учун жазо сифатида асосий таркибдан четлатишга қарор қилгани ҳақида маълумот пайдо бўлди. Мураббий бу маълумотни тасдиқламади.
"Йўқ, бу техник ечим. Биз Рунини танладик, чунки у аъло даражада машқ қилди, унинг кайфияти ва ишга муносабати ақл бовар қилмайдиган даражада," - дея Фликнинг жавобини келтиради Barca Universal.
